d axxam n tusna Tamazight

Nembeddal deg udmawen nnegh, cek tisid tifras inu, nec isigh aoban nnec, snegh manis mma ghar kkegh ad inin nec d cek, ad dayi jjen ad adfegh ghar ixxamen nsen, ghar ugensu nsen, nebra tinfar n usnuwji, minzi twaran ayi d ccek.

Yennas i yesmegh nnes:

- Zall ayi ghar idvaren, nec d akkuc nnec, arr ayi taynit...

Yudar ismegh isudvm as tifednin, yuri d yetru, isutar ghars ad das iwadem s izrfan nnes, ad t yejj ad yiri sadu idvaren nnes min ghar yek netta di tudart.

Zrigh t iffuppart, yarra ixf nnes d Aferoun, ineqq iseddar, uca iqqar asen:

- Nec war tmettigh, waxxa mmutegh raxart inu ad day wem teqqim d tudart...

Jar igudar n tqesfin nnes tudart tbedd x umuzzar. Udsegh ghar ijjen n ismegh zeg imezdagh n teqseft, udaregh ghar umezugh nnes ad t sseqsigh s cawy cwayt, huma war d anegh d itesri ca n ijjen nneghnit ad yekssi aseqsi inu d taghrusvi ghar wakkuc nni, nnigh as:

- Min yegga yesmegh nni umi t yarra ilesseh as idvaren am uydi?

Yarr d xafi s ukemmec n tammiwin, war izemmar ad yessiwer, war izemmar ad yini ca, ufigh iqess as iles, yejji t bra yawal.

Nghigh aseqsi nni jar imi inu, huma war dayi teksen iles ura d nnec.

D ttidet mara ksen ac iles min dac ghar yeqqimen zeg wagra nneghnit, ad cek nghen s cawy cwayt, ad tnedred ixf nnec s ixf nnec deg imedvran nsen.

Ismegh nni yejji t ad yiri sadu idvaren nnes, ad xafs ioeffes mermi mma yexs, yarni yas di tesghart n buhbel, maca nec war dayi yessin belli bedlegh aoban inu s ijjen nneghnit, iri igga yi ccerwaw ad dayi yejj d tiggaz x marra udmawen n rwacun n teqseft nnes, huma ad taf war tettun tanfust inu.

Arrigh taynit i tudart a n taggant, mani djan wuccanen ffuden tisessi n tidi n inneghnit, mani ffuden ura d askaf n idammen.

Tekk d tayyut x tittawin inu, arezzugh x wufugh zi tewwart itawyen ghar umedukel inu, ad das aregh udem nnes ad dayi d yarr wenni inu, ssnegh mara ddaregh s wudem n midden nec mmutegh.

Ufigh ufugh, usigh d ghars, yarra yi d agra inu, maca jjigh ad yi d yarr x useqsi nni ghari yeqqimen yuyer.

- Min yegga yesmegh nni din zrigh ilesseh idaren n wenni?

Inna yi d:

Wenni d nnec, yardver ayi d buhber zi tudart nnes, maca yexs war teddaregh d nnec mammec djigh, ufigh ad ghufigh mara war djigh d nnec.

(Tarraguna 2008)