Tanfust taqudvadvt:
Taxfift n unwal
Tixfifin... tixfifin... manis mma tekid d tirewriwin, aqartvasv imdareyyec ssa d ssa, s tudusi nnes yessiriw isinuten n waggu abercan x idurar, isseghray war iteffez, ineqq war ifarren deg uharmuc ura d awessar ura d amepruc, yeghdver marra wi d yekkin zzat nnes, wenni izemmaren ad yarwer yuri ghar wedrar, wenni war izemmaren yudf it wexfif d inexrioen.
Axfif n unwal oad yeddar, wi yennan ad yarca!! Oad acar n iyyar nni issawar s uqartvasv, carzen t imecraz aked imendi, ighemmi d ura d netta s idvennadv nnegh, itidar anegh d amezruy nni huma war t ntettu.
Jeddi ameqran yeddar d aqidvar, tzedgh it texfift, tarz it zi tecoeft n udvar, yeddar s wexfif ineqqen, ahewwas yus d ad anegh inegh, soa neddar s minzi d yiwi raxart, yufa war n tmetti, yuher isdvuqqez d rmaynat x izedjifen nnegh, d neccin narenni tudart. Innexreo day negh, yeqqim ittvebhet, yarwer ad yini tinfas nnegh i wmadval, “irifiyyen nni oad ddaren, uggin ad mten, wi d anegh yennan adfem ghar ucar nsen d adaf”. Tughi ten tyarzawt, maca udfen d, jeyhen azzray nnegh s wexfif nsen, jeyhen amezruy nsen s ibeqqidven n idammen nnegh.
Mmis n jeddi yuyer taxfift n babas i yiri nnes d tisedjest, zi tuffut ghar tuffut itemsawal akid s, teqqar as:
“Farrnet acar n unwal, aqqa yeccur s wexfif, tayremt d tibratin i ridaret n warraw nwem, aqqa din wi yexsen ad tettum iwezwizen yejja deg wur ucar nwem, seqsat inuba nwem x tiqqas nnegh nejja x idurar nwem”.
أضف تعليقا
<<الصفحة الرئيسية