Tanfust taqudvadvt:
"Muci" war yedji d midden!!
Yura t:Said BELGHARBI
Amazigh31@hotmail.com
Tiseghnest n Trayetmas inxarrem-as waghghraw s wattvas n weghnas. Teddu s tigemmi n Muci, huma a das iodel min zzay-s d iftuttzen n nnuqart.
Muci d amezdugh, ura d netta d mmi-s n dcar, azvwar-nnes yeghmi-d deg acar di d ghemyen izvewran-nnegh marra. Mara nenna-s neccin d imezdagh cek tusid d ametluo, ataf uar d neccin nused zi manis d yusa netta, maca marra idnegh d imezdagh deg ijjen n wexxam.
Yeqqim Muci x tpidvurt, zzat-s arrabuzv, itsvudv zzay-s deg wur n tmessi yarghin d arsawen, aweqqeh n isefdvawen issefsay nnuaqart, itara-t am waman qquren, tudumen di reqwareb, teffghen-d d tiseghnas, nigh d ixerxaren temraywan x tceobin n tniba n dcar.
Neqqen i wurawen-nnegh ijjen n weghnas, di dcar ismun-anegh ijjen n uzir, txemmer-anegh ijjet n tmeddit, netted zeg ijjet n tara, necca anggur deg ijjet n tebqect...
Trayetmas trehhef s uhewwaq i wudem-nnes, tudef x Muci, ijja-s amcan i wghimi, huma at reqqem abzim n tseghnest s ufuss-nnes, ifassen iswizan iwmuni d weodar hsen zeg inni iswizan i wardar n min imunen, min d-anegh ifesyen at nesmun jar-anegh, Trayetmas teswiza aked Muci deg aodar n tseghnas-nnes yarzen.
Yenna-s Muci i Trayetmas:
- Ghensi-t i rizar-nnem, ad twarigh ma usinti-d ca x tcuni-nnem.
Deg wawar n Muci attvas n tighit yenuffaren, maca Trayetmas tettu tiseghnest, teghnes iwaren n Muci d tayri ghar wur-nnes.
* * * * * *
Muci itaca aked ixf-nnes d midden jar-asen, d amsebrid, d ismegh, itarem tibardiwin, iteqqen ticedvyin i yeghyar-nsen, d amzir itreqqam tiyarsiwin n isughar-nsen. Itaca aked tesghart-nnes tetwacc.
Affegan umi ghar yemsar ammu s-ughghir a dya-s ass di ghar yedha d agrawli, ad yarzu x tiseqqar-nnes jar amziwen yumsen raxart i tudart.
Jar imezdagh d Muci tadukli ghar yedja udem n zic, maca netta yessen tidet n tuffrin n waydud di iyteddar, mani itaca aked tadukli-nni tarecca, itaca din aymaren jar-asen, jar-as-d d Trayetmas i yugin atemrec ghar Muci s taqsuhi n izerfan yudvnen di twangitin n imezdagh, Maca amuni-nni yugha s tghennanin di radjagh n tughgherma-nsen, amezruy yenna-negh di tefray-nnes, msemracen jar-asen, msarrawen, aydud imeghghar x ixf-nnes, maca rexxu tiriwen day-s imenghan ugha war yedji wudem, imenghan it-jeyyafen tudart n tcuni, tcuni-nni yeqqimen d asutar ghar Muci d Trayetmas.
* * * * * *
Yused lta n tzadjitin, Trayetmas tara udem-nnes ghar akkuc, tudef di rfadj n tzadjit-nnes, Muci yara udem-nnes ghar akkuc d wenni, yudef deg izerfan n tzadjitin-nnes. marra deg ijjen n useddi, d sadu ijjen n wexxam, d zzat n ijjen n wakkuc.
أضف تعليقا
<<الصفحة الرئيسية