Tinfas
Aṣwaḍ yebuyebḥen !
Mohamed ZAHID
Immarnid ijjen udellis d amaynu γar tedellist Tamazight, id yessufeγ amyaru d uzrawi Saεid Belγarbi.Adellis-a yesmunan ijjen taqebbit n tinfas tiquḍaḍin id yusin adu isem “Aṣwaḍ yebuyebḥen“. U zi min xaf-sent tenna tazrawit Maysa Racida, i yuran tamsizwarut i wdellis-a : « usint id tenfas a xsent ad inint ca n ixarriṣen, ca n tinawin, ca n taycitin (…) Usint id ad inint min yedjan, ad inint min yenufaren, ad siwḍent min yegwaren γar wawaḍ (…) Tinfas a d ijj n usijji yefsus x wattas n imarrisen, imarrisen a itwara umatneγ Saεid xsen ad twarin u xsen ad ssemren ixfawen nsen ».
U zi imarrisen id yusin di tinfas-a i yura Saεid Belγarbi, ntaf marra min yeqnen γar tamurt, tayri, tameggit, tasγart, tamγart, tirelli… d wattaṣ n min iqnen γar tudart i yteddar aydud Amaziγ, u zzay-s aγezḍiṣ n umezruy : « Di lta di tuγa ca n yewdan ssermaden i yessitsen aḥrad s ccicwar γar tisitin n wareγ, tuγa Trayetmas jar tisedjya n idurar, rebraqi dduquẓen γar uzedjif nnes, tessaḥret s dqer n rmunet i tarbu x weεrur nnes d reεwetc i yemjahden izedγen deg zeγran n dcar, ḥettan car n Tamezγa ḥuma war t ticaren iḥewwasen ».
Tinfas-a d ijjen uṣurif imγar iteggit amyaru Saεid Belγarbi ar warni attaṣ n wussan i yeεdan xef tira s Tamaziγt iy-tegg Saεid deg iyyar n usefru, d ungal, d tinfas.
U zi tinfas-a tinaid yusin di wdellis-a amaynu ntaf: ahrudji, waf, isekraf n raẓ, aseqsi yujaren ixef nnes, tasarrawt n unaruz, taffa n imunas…
U mara nedwer-d γar wawar n Saεid id yusin di tinfas-a, ntaf yeqqar:
«Ticri inu γar weṣwaḍ nni zi mermi d nettat traja yi akid s muneγ, ḥuma adas secneγ amṣebḍi nni din jar aneγ, maca mac γa d eggeγ nec d ameεdur n isuraf, minzi ttuγ ideren di radjaγ n tarja inu, umi γar sen γa d dewreγ ufiγ gwaren zzay sen yenneγnit ».
أضف تعليقا
<<الصفحة الرئيسية