d axxam n tusna Tamazight

Tanit takuct n imazighen:

Amezruy d issiwren s tugherma nnes

Yura t: Said Belgharbi

 Tanit d takuct n tudart, d taoessast n tmurt d radj n  wazul d umcubbec, d manawya i d yusin x yires n umezruy d ighemyen di tmurt n tamezgha.

Tanit d idji s n BUSIDUN akuc n ayel d waman, inna umezruy tugha day s azri s wattas, tugha ghar s tittawin d tizizawin am tuzziyzewt n waman, temsarwas di baba s Busidun.

 Maca di tumyin n tugherma n Lighriq qqarent tumyin nni x umeddur n Tanit nigh Atina d idji s n ZIYUS akuc n umcubbec d imenghan d amghar n akucen n timura d yunden marra i tmeqyast n ayel acemera.

Yused deg dellis "akucen n masar" i yura umsermed Bidij, iqqar deg dellis a, Atina izuran nnes ghemyen d zi tmurt n Libya, teqqen ghar rwacun n akucen tugha isegguren tammurt a, rwacun nni tugha day s krad n akucen PALAS d ATINA d MADUSA. ura d Hirudut iqqen tamagit n Tanit ghar inuba n imazighen imezdagh n Libya,  Aflatun ura d netta yidarit di tira nnes s usemqar n Banit, imsermad yarezzun deg mezruy amenzu arin asemqar n Banit ghar Tanit, Aflatun yenna Banit tugha t d takuct tameqrant x tmurt n Libya, din inni iqqaren Banit d Tanit war djint ca d icten maca tugha djant d tiwetcma tin nigh tugha  din jar asent tighuni n tidukla, minzi s ssin i d sent tugha djant d tijedjidin x imezdagh d agra n tmurt n tamezgha.

Yused deg mezruy n masar amenzu, Tanit d asemqar n tjedjit tameqrant umi tugha qqaren AZIS u nettat d tamghart di lta d ijj d utcma s n  ujedjid Azris, Imezdagh n masar tugha oebden tet.

Attas qqaren belli Tanit trur di tmurt n Tunes d yusin di tamezgha ixf n afriqya, u tammurt n tunes tisi ura d asemqar nnes, yused di tefray n umezruy tammurt a tugha qqaren as tunit idwer uskil n "s" d "t", uca izri usemqar zi Tanit  ghar tanis arami yiwed ghar  tunes, d asemqar i tisi tmurt a ar assa.

I tghima anini Tanit teghza asemqar nnes jar amezruy n zic di tmurt n  imazighen d iqartajiyyen d iafrounen, u tiwed s izerfan n tsertit nnes ghar ijj n ticcewt n tugherma zi tugha tesggur tamezgha.

Tugha t zi temgharin timazighin yurin amezruy nsent s tagrawla, amezruy nni war tent i tettu mermi mma yidared timgharin  n umadal a tid yidar x yires nnes d tamettut n tirugza.